बर्षार कारनत झापा लगायत तराई जिल्लालात बढ धन जनेर क्षेति

       झापा साअन २८ः झापा लगायत तराईर बिभिन्न जिल्लात कुछु दिनसे निरन्तर पानि पर्वार कारनसे आर कालि रातिकरे हुवाल भिषन बर्षार कारनत झापा जिल्लार विभिन्न ठाइलात बड मात्रात धनजनेर क्षति हवर साथे हतिना बसोबास कर्वार लोकलाक प्रभावित कइचे । 

      नेपाल रेडक्रस सोसाइटि, झापा साखार अनुसार जावार रातिकार ९ बजे कनकाई लदित पानिर सतह ५.५ मिटर से उपरत आसिचे । सामान्यत ४.२ राक खतरार रुपत लिवाजछे । रेडक्रस सोसाइटिर जानकारि अनुसार आल्हातक गौरिगन्ज ८ आर झापा गाउँपालिका ४ करिएने १२ घरपरिवार विस्थापित हुवाल स्थति छे । 

      कालि शुक्रबारेर दिना कनकाई नदित आसाल बाढिर कारनत विस्थापित गौरिगज २ एर ५ घरपरिवारक आल्हा आमगाछि प्राथमिक विद्यालयत राखाल गिछे । अनङ्गेकरे बिस्तिबारेर दिना कमल लदित आसाल बाढिर कारनत कमल गाउँपालिकार वडा न १ बस्वार सुकुम्बासि बस्तिर ३ घर परिवार समेत विस्थापित हइचे ।अनङगेकरे झापा गाउपालिकार वडा न ७, मादरगाछत कनकाई लदिर पस्वार करनत ४ घरपरिवार विस्थापित हुवाल स्थतिर जानकारि झापा रेडक्रसेर अभिशेक पोखरेलर जानकारि कराइचे अहिर क्रमत झापा जिल्लार भिन्ना–भिन्नी ठाई करिएने ३ सय ९ घरपरिवार आल्हातक बाढिर कारनत प्रभावित हवा पुगिचे । रेड्क्रसेर अनुसार भद्रपुर नगरपालिकार पथिविनगर –८ अत १८० परिवार, भैसाबाडित १ सय ३० परिवार गौरिगन्ज माहाभार ९, रङ्गिया थानत ५०–६० परिवार, मेचिनगरेर ज्यामिरगढित ४५ घर परिवार बाढिर कारणत जोखिमत पर्वार काथा रेडक्रसर संस्थारा बाताइचे ।  

        बाढिरे कारनत मोरङ् जिल्लार मिक्लाजुङग गाउँपालिकात वडा न २ अत रहाल बक्राह लदित बगिएने ३२ बर्षिय गंगाराम खतिवडार मरण हइचे । शुक्रबारेर दिना लदित बहेने बेपत्ता हुवाल खतिवडाराक सानकरे साढे ६ बजेरति मिक्लाजुङग ८ अत मृत अवस्थात पाआल काथा उलाबारिर प्रहरि निरिक्षक चन्द्रबहादुर थापा र जानकारि कराइचे ।