विचार द्वारा हामा सुखि बनुवा सकेचि

बिभुति नारायण राजबंसि

विचार एक्टा एनङ्ति सक्ति हय जहार द्वारा हामा हरेक कार्य सफल बनुवा सकेचि । 

इड जगतत् गटे चिज से विचार आर बुद्धि अति सछम आर बलवान कहे उपनिसदलात वर्णन करिचे । योगिलार सिद्धान्त छे कि विचार से जेइला इच्छा जाग्वे अईला प्राप्त हबे । यहाँर मतलब सुन्दर विचार से सुन्दर चिज प्राप्त हबे आर खाराब विचार से खाराव चिज प्राप्त हवे । असल विचार उलाक कहे जैठिन निस्वार्थ, सत्यता मन, वचन आर कर्मत सात्विाता छे । 

      सुखेर बाहेक आर दसरा विचारलाक मनत् प्रवेस करुवा नादि, क्याँकि मनत सवखुना जेनङ् सचिरहम अनङ्ितए दस्रा प्राप्त हबे । जदि काहाअ खोव दिनदसात पुगाल छे, यहाँर हिनतार कारन उहारे विचार हय । मनत उब्जुवार विचारलाए भविस्यर विचन हय । दुख दरिद्रर विचारलाए मनत दृढ निकय काहअभि सुखि हवा निसकेचे । मनड खेत समान हय, हतिन कुछुनि कुछु विचार उत्पन्न हते रहचे । कोई भि विचार सुख वा दुख देछे, ताहले इला काथा ध्यान राख्ले हामार जिवन सुध्रिवा सकेचि ।

जदि तुई दुखिछिस, दरिद्र छिस, हेतना काहार दोस निछे, दोस तोर भित्रते छे । दोसलाक छब्वार तहरे काम हय । ताहाते आप्नार मनडक सदा देखेक । तोर मनत दुखदायक आर अपवित्र विचारला ढुकुवा नादे । इला बातला से तोर प्रगति हबे । आप्नार अवस्था देखिए आप्ने तोक आस्चर्य लागिब्कु । 

लोकला कहचे, ईस्वरट आप्नार भक्तलाक दरिद्र बेनाचे । ईड वात ठिअ नाहय, क्याँकि ईस्वरट ना काहाक दरिद्र बेनाचे ना मुर्खय बेनाचे ना बलवान, ना धनवान, ना विद्वाने बेनाचे । ईस्वरट त परम दयालु छे । सभारे ईच्छा पुरा करुवाचे, जाहे जेनङ् ईच्छा करेचे आर जाहारे मनत जेनङ विचार उब्जेचे अइअन्सारे ईस्वरट उहाँक फल देछे । जाहे जेनङ् विचार कर्चे, उहाँ अनङ्तिए बनेचे । 

गिता–“जेनङ ईच्छा कर्वो आप्नाक अनङ्तिए मानेक”, दुई आर दुई मिलिए चार हचे, हेतिना जेतेखान सत्य छे, अतेखान इड सिद्धान्त सत्य छे, अनुभुत छे । देखेक आर अनुभव करेक । किंचित विचार राख्ले पुर्ण परआत्मा से अपुर्ण संसारेर सृस्टि क्याँ होल । सम्पुर्ण विस्व आर जिव दिब्य नियमेर बसिभुत छे, नियम विरुद्ध काम कर्ले लोकेर परिणाम कस्ट हबे । प्रत्येक गल्तिर कारनत जिवनक कस्ट सहवा परेचे । उहाँक नियमेर उल्लघन कर्ले सजाय मिलेचे । मतुन उहाँ दुखेर कारन आप्ने छे । यहाँर मतलव कि लोकलाक पुर्ण हवार ताने बेनाइचे । लेकिन स्वय आप्नार भुलेर कारनत कस्ट भोगेचे ।