झापात् स्वरोजगारेर ताने गाभुरलाक पच्चीस करोड

       सरकारट गाभुरलाक व्यवसायी तथा उद्यमी बेन्बार उद्देश्यसे सञ्चालनत् आनाल स्वरोजगार कोष मार्फतसे झापात यि चटि २५ करोड लगानी कराल जावार हइचे । अर्थ मन्त्रालय अन्तर्गतेर युवा तथा साना व्यवसायी स्वरोजगार कोष सचिवालय मार्फतसे जिल्लात् उला रकम लगानी कर्बा लागाल काथा स्वरोजगार कोष अनुगमन समितिर जिल्ला सचिव सन्तोष सापकोटार जानकारी दिले । उहार अनुसार  ४३ रा सहकारी संस्थामार्फत दुई हजार २०० से बेसि गाभुरलाक  ५० हजारसे लाख टाका तक प्रदान कराल जाबे । पुर्ना १७ आर नायाँ २६ टा सहकारीला व्यापार–व्यवसाय सञ्चालन करिएने स्वरोजगार बन्बा चाहबार गाभुरलाक चुनिएने लगानी कर्बे ।

       सरकारसे सुचीकृत उला सहकारीला स्वरोजगार कोससे पाँच प्रतिशत ब्याजत् रकम लिएने १० प्रतिशत ब्याजत् लगानी कर्बे । कोषमार्फत रकम वितरणेर ताने सहकारी संस्थार सँगे सम्झौता समेत हुवाल आर गाभुरला व्यवसाय सञ्चालनेर ताने माग कर्बार रकम बराबरेर निःशुल्क लोक आर व्यवसायर  बीमा कराल जावार काथा सापकोटार जानकारी दिले ।

       स्वरोजगार कोषसे रकम लिएने नियमित किस्ता तिरिएने इमान्दारिता देखाबार युवालाक सम्झौता अवधि सकिए जावारबाद ब्याजेर ६० प्रतिशत फिर्ता कराल जाबे । यहार आगुत युवालाक तीन किस्तात्  रकम दुवाल जाबार कर्बारसे आप यिचटिसे एकेखेपे गटे रकमला प्रदान कराल जावार काथा सचिव सापकोटार जानकारी दिस्ले ।

       “किस्ता–किस्तात् रहब दिले युवालाक पुँजी परिचालनत् समस्या हबारसे एकेचटि गटेलाए रकम दिवा लागाल हए”, उहाँए कहले, “एके चटि रकमला दिले प्रभावकारी हबे ।” स्वरोजगार कोष मार्फत यहाँर आगुत जिल्लात् १रा सहकारीला ८४४ गाभुरलात आठ करोड ८५ लाख टाका लगानी करिस्ले ।

       अनङेकरे सहकारीलाक सात प्रतिशत ब्याजत् रकम प्रदान करालसे सहकारीला गाभुरलाक १२ प्रतिशत ब्याजत् लगानी करिस्ले । यि चटि ब्याजुर  दर घटाएने सहकारीलाक पाँच प्रतिशत आर सहकारीला गाभुरलाक १० प्रतिशत ब्याजदरत् लगानी कर्बे । सरकारट स्वरोजगारेर माध्यमसे विदेश पलायन हबार संख्या घटाते स्वदेशते कामुवार आर स्वदेशते रमाबार वातावरण निर्माणेर तानेकोष सञ्चालनत् आनाल काथा संयोजक सापकोटार बताले ।