एकादेशत कानालार
राज्य छिले । सभाए काना हलेअ राज्य ब्यवस्थाड आच्छासे चलिए रहाल छिले आर राज्यर
आत्मनिर्भर भि छिले । कानाला राज्य संचालनेर ताने हरेक चार बछरत पाँचझना
मन्त्रीलार चयन करे । यीला मन्त्रीला
दिनहुँ राज्यर बिभिन्न ठाअँलात घुमिएने गटेलारे दुख कहिनीला बुझबार आर जेतेखान
धमकरे हले अतेक जल्छि समाधान कर्बार करे ।
यि चटि बनाल
मन्त्रीमण्डलड जिलुमे सक्रिय छिले आर जनतालार समस्याला धमकरे समाधान कर्बार संगे
नायाँ नायाँ कामला शुरु कर्बार घोषणा करिस्ले । जनतालाभि मन्त्रीमण्डलेर कामसे
बहुते सन्तुष्ट छिले । काम बारते जाबारसे मन्त्रीमण्डलेर दौडधूपलाभि बारते गिल्कि
। ताहाते आप बेराए मात्र गटे कामला कराल
निजाबे कहबार बहाना बेनाएने मन्त्रीमण्डलड आप्नाक सुबिधाला थप्बारति उपायला सोच्बा
धर्ले । लाम्ह छलफलेर बाद मन्त्रीला आप देश भ्रमण कर्बार ताने हत्तीर ब्यवस्था
करिबा पर्बार ठहर करिए सोही अनुसारेर प्रस्ताव जनतार आगुति लेगाले । यिड
मन्त्रीमण्डलड देशत आच्छा काम कर्बारसे अमारसे आह्र आच्छा कामेर आशा कर्ते जनताला
उड प्रस्तावक पारित कर्ले ।
मन्त्रीमण्डलेर
देश सयर कर्बार ताने भेल्ला पेइसा खर्चा करिएने हत्तीला किनिए आनाल गिले ।
मन्त्रीलार भ्रमणेर योजना अनुसार हत्तीलाक देशेर बिभिन्न ठाअँलात लैजाबार ताने चखु
देख्वार माहुतियार दरकार महसुश करिए भिन देशसे भेल्ला तलब आर सुबिधा दिबार गरी
माहुतियाक आनाल गिले । येनङकरे कानालार राज्यर देशेर ढुकुटीसे बड धनराशी खर्चा
करिएने मन्त्रीलाक नायाँ सुबिधा प्रदान कर्र्ले ।
सुरु सुरुत
मन्त्रीला हत्तीत चढिएने दिनहुँ दुरदुर तककार ठाअँलात घुम्बा गेले, जनतालाक सुख दिबार ताने भेलेला नायाँ नायाँ
कामला भि कर्ले । माने समय बित्ते जाबार संगे मन्त्रीलाक रसेरसे मात चढ्वा धरिल्कि
। दैनिक रुपत देश सयर कर्बार छडीएने आप हप्तार एकचटि मात्रै आर कुछु समयर बाद
महिनार एकचटि मात्र डुल्बार कर्बा धर्ले । तेश्रा बछर लाग्वारबाद अमा आप त छ
महिनात एकचटि मात्र घुम्बा निस्किसले आर आह्र समय मोज मस्ती करिएने बित्बा धर्ले ।
यहार बिचत
मन्त्रीलाक आपुन चढबार कराल हत्तीला यथार्थत् केनङति छे कहबार जिज्ञासा हले ।
माहुतियाड सबेबेला आप्नाक साझोए हत्तीर पिठिखात् राखिदिबार कर्बारसे अमाक गटे
हत्तीर बारे नकारी लिबार ईच्छा जाग्ले । उमा माहुतियारक आप्नार इच्छार जानकारी
कराले । माहुतियार भि पाँच झनाक भिनाभिनि
लेजाएने क्रमशः हत्तीर सोर, कान, ठेङ, पेट आर नेटर बगलत राखिदिले आर लारबा कहले । आपुन हत्तीर जेइड अङ्ग लारिस्ले
हत्ती कहले अहिर हए कहबार लख मन्त्रीला काट्ले । सोर लारबारट हत्ती कहले मट आर लरम
पाइपेर लाखा हचे कहबार बुझ्ले । अनङेकरे कान, ठेङ, पेट आर नेट
लारबारला क्रमशः हत्ती कहले कुला, खुटार मट खामा,
बड हाण्डा आर मट सुतार लाखा बुझ्ले । सभाए
माहुतियाडक हत्तीर आफ्नारे परिभाषा सुनाले, एक आपसत छलफल कर्बार चेष्टा भि निकर्ले । माहुतियाड कुटील
हासि छडले ।
मन्त्रीला आप
जनताला कामेर ताने देश सयर करवारसे दिनहुँ हत्ती लारबार आर मोज मस्ती कर्बारते
ब्यस्त रहबा धर्ले । अमा जनतालार आवाज सुन्बा छडिएने दिनहुँ हत्ती लारिएने अमार
मालीक हबा पाएने गर्व कर्बा धरिएने खाली मोज मस्तीते डुब्बा धर्ले । अमा पहिला
जाहे जैला अङ्ग लारिस्ले, माहुतियाड दिनहुँ
अहिला अङ्ग मात्र लारबा दिबार करे । भिन अङ्ग छे ना निछे आर हत्ती कहले एतेकिना
मात्र हए कहबार सोच अमालात कभिभि निआस्ले आर माहुतियालाडक सोध्बार कष्ट भि निकर्ले
। देशेर ढुकुटीस्े किनाल हत्तीर मालीक हबा पाएने गर्व आर अहंकारसे अमार बुद्धिखानत
जिप्टा लागिगिस्लिकी ।
मन्त्रीलाक
घुम्बा लेजाबा निपरबारसे माहुतिया डभि बसिए बसिए खाबा पल्कि गिस्ले । मन्त्रीला आ–आप्नी हिसाबसे कराल हत्तीर परिभाषासे फाईदा
लिबार कुटील उद्देश्यसे माहुतियाड एक्टा प्रयोग कर्बार सोच निक्लाले । उहाँ
हत्तीलाक भिन ठिना सार्ले आर हत्तीर अङ्गलार ठिना अहि अनुसार सोरेर ठिना मट नली,
कानेर ठिना कुला, पेटेर ठिना हाण्डा, ठेङेर ठिना खुटार खामा आर नेटर ठिना मट सुता
एकदम सतर्कतार साथ मिलाएने राख्ले ।
कालिकरे
मन्त्रीला हत्ती लारबा जाबार बेला अमा सबेबेलाकार लाखा चालाखी करिएने जाहे जैड
अङ्ग लारबार करे अहि अनुसार राखि दुजाल जिनिसेर बगलत लैगेलेने । मन्त्रीला हत्तीर
अङ्गलार बदलात् अहि नली, हाण्डा, कुला आदि ला लारिएने हत्तिला अहिठिना हुवाल कहते ढुक्क हले
। आप्नार प्रयोग सफल हबारसे माहुतियाला छक परिएने पिचितकरे हास्ले ।
माहुतियाड आप
मन्त्रीला छ महिना वा एक बछरबाद मात्रै देश घुम्बा जाबार हएने उहाँ आपुन रहबा
पर्वार औचित्य निहुवालसे कुछु समय बिदा लिएने आप्नार देश जाबा पाउँ कहने नेहरा
कर्ले । मन्त्रीलाभि आपुन घुम्बा जाबार बेलात उहाँक खबर कर्बार आर अहि अनुसार
माहुतियार हतिना उपस्थित हबा पर्बार सर्तत् उहाँर पारिश्रमिक दिएने उहाँक बिदा
दिले ।
माहुतियाड आप्नार
पूर्व योजना अनुसार हत्ती लाकभि आप्नारे संगे सुटकरे लिएने गेले । मन्त्रीला माने
सुता, कुला, हाण्डा, खामा एहिला जिनिस लारिएने आपुन हत्तिर मालीक हबा पाबारसे
दङ्ग परीएने जनतालार बेवास्ता कर्ते मोजमस्तीते दिन बिताई रहले ।
Post a Comment