हुका हुकि मिडिया ग्रुपेर अन्तरक्रिया कार्यक्रम सम्पन्न

      झापा साउन २३ ; बिर्तामोड स्थित प्रेम होटलत हुका हुकि मिडिया ग्रुप नामक संस्थार आपनार आस्वार दिनलात संस्थार काम, कर्तव्य आर जिम्मेवारिर बिसयत छलफल कर्वार ताने एक कार्यक्रमेर आयोजना करिचे । राजबंसि समाज विकास समितिर केन्द्रिय उपाध्यक्ष भरत कुमार राजबंसिर प्रमुख आथित्यतात आयोजना कराल उखान अन्तरक्रिया एंवम् छलफल कार्यक्रमत कोचिला मुक्ति मोर्चार कृति रजबंसि, रा.स.बि.स. झापा जिल्लार उपाध्यक्ष तारा राजबंसि, हल्दीवारी गाउँपालिकार वडा न २ सदस्य खगेन राजबंसि, कोच कलाकार हंस राजबसि, टेक बहादुर राजबंसि लगायत लार उपस्थिति छिले ।

         कोच, आदिवासि युवालार मिडिया क्षेत्रत पहुच बेन्वार मुख्य उदेस्य से २०७२ सालत स्थापना हुवाल इखान संस्थार संस्थापक अध्यक्ष अजय ताजपुरिया हय । आल्हा वर्तमान समयत संस्थार अध्यक्ष लय सरि राजबंसि उपाध्यक्ष संजय राजबंसि, सचिव रबिन राजबंसि, कोषाध्यक्ष निर्मला राजबंसि, सदस्यत निसा राजबंसि, गाइत्रि राजबंसि, मनिसा राजबंसि, किरन राजबंसि, प्रभा राजबंसि, बिनिता राजबंसि आर राजेस राजबंसि रहाल छे ।

     विभिन्न सांस्कृतिक कार्यक्रमेर आयोजना करिए कोच समुदायेर उतकृष्ठ पत्रकार तथा कलाकारलाक सम्मान कर्ते आसाल इखान संस्था र समुदायेर युवालार ताने विभिन्न किसिमेर तालिमेर संयोजन आर सहजिकरण समेत कर्ते आसिचे । अनङेकरे संस्था र छुवाछट लार ताने बाल मिडिया ग्रुपेर समेत निर्माण करिचे । आल्हा संस्थाराक दिसा निर्देस कर्वार ताने बिजय राजबंसि, अजय राजबंसि आर टेक बहादुर राजबंसि समेतेर ३ झनकार सल्लाहाकर समितिर समेत निर्माण हइचे ।

        आस्वार दिनत बैधानिक तरिकासे संस्थाराक संचालन कर्वार ताने दर्ता प्रकिया आगुविति बाढावार साथे मिडिया क्षेत्रत आर्ह दक्ष जनसक्ति तयार कर्वार ताने विभिन्न आर.जे., भि.जे. लगायत व्यक्तित्व विकासेर तालिमलार समेत आयोजना कर्वार काथा संस्थार अध्यक्ष लय सरि राजबंसि कार्यक्रमत जानकारि कराइस्ले ।