मिसेज कोसि पुर्वान्चलत पदमा राजबंसि

फोटो : फस्ट रनरप  पदमा राजबंसि

      भाद्र २४ बिराटनगर : बिराटनगर स्थित बिरेन्द्र सभा ग्रिहत गत जावार सनिबारेर दिन पहिलाबार आयोजित हुवाल मिसेज कोसि पुर्वान्चल कार्यक्रमत रङ्गेलि ७ बस्वार श्रीमति पदमा राजबंसि फस्ट रनरपेर ताज पहनिवार सफल हइचे । अनङ्गेकरे श्रीमति काब्या बिस्ट मिसेज कोसि पुर्वान्चल आर श्रीमति उर्मिला राजबंसि सेकेन्ड रनरपत आस्वार सफल हइचे । 

      जय मिडिया मेनेजमेन्ट प्रा.लि. द्वारा आयोजित उत कायक्रमत ९ झना सहभागितालार उपस्थिति छिले जाहार मध्ये ४ झना राजबंसि क्रमस पदमा राजबंसि, उर्मिला राजबंसि, तुलसि राजबंसि आर प्रिति राजबंसि उत कायक्रमत आपनार सहभागिता जानाइस्ले । 

      पहिलेसे मिस्टर आर मिस पुर्वान्चल कार्यक्रमेर आयोजना कर्ते आस्वार उक्त मिडिया मेनेजमेन्ट प्रा.लि. द्वारा पहिलाबार बिवाहित महिलालाक लक्ष्य करिएने इखान मिसेज कोसि पुर्वान्चल नामक कार्यक्रम आयोजना करिस्ले । उक्त कार्यक्रमत मिसेज कोसि पुर्वान्चलत बिजेता काब्या बिस्ट , फस्ट रनरप बिजेता पदमा राजबंसि आर सेकेन्ड रनरप बिजेता उर्मिला राजबंसिक आयोजक समिति क्रमस ५१०००/-, ३५,०००/- आर २५,००० /- टाकार पुरस्कार सहित ताज दिए सम्मान करिस्ले । 

फोटो : सेकेन्ड रनरप उर्मिला राजबंसि

      बिभिन्न सामाजिक कार्यलात अग्रसर हवार अम्हा पदमा राजबंसि पेसासे सिक्षिका हए आर हाल रङगेलि आर्दश टोल स्थित श्री आर्दश माध्यमिक विद्यालयत कार्यरत छे । बेतोना घर हएने हाल रङ्गेलि ७ बसोबास कर्ते आस्वार अम्हा आपनार सफलतार कारण आपनार बेटि आर घरेर लोक जगननाथ राजबंसिर साथ सहयोग आर हौसलार कारनत उक्त स्थानत पर्वा सफल हवार काथा बाताचे ।

      समाजत महिला लाअ आगुबिति बढ्वार जरुरि छे आर अम्हाक आगुबिति बाढावार ताने घरेर लोक लार मुख्य भुमिका रहचे अइताने समाजत महिलालाक आगुबिति बढ्वार अवसरेर सिर्जना करावार ताने आर साथ सहयोगत जुट्वार ताने अम्हा सम्पुर्णलाक आग्रह कर्वा चाहाचे ।