बेबुद्धिया किताव, बुद्धियार निन्दुर

n  टेक नारायण सिंह (फुलवारि, चकचकि)

                एक जमानात एकखान चिरिक–बिरिक किताव रहे । उखान कितावत् निन्दुर पक्रुवार भेद लिखाल रहे । गटे पन्नालात् उखान कितावक् भान्सि घरत खुलाल छरि दिस्ले । एकघुरिवाद, उखान कितावक् एकटा निन्दुरेर दल घेरिए लिल्कि । कितावखान हुंकार दिए बलिए उठिल, “दुर भागअ । जानेचन नानि, मुई काहाँए हऊ ?”, “क्याँनि जानेचि सुना ! तुई एकखान किताव हइस ।” एकटा निन्दुर बलिए उठ्ले ।

                “तुई बेबुद्धिया हईस ।” कितावखान घमण्ड से बल्ले, “मुई जेनङ् सेनङ् किताव नाहऊ । मोर भित्रेर पान्नालात निन्दुर पक्रुवार भेद लिखाल छे । तुई जानिए बुझिए मरनेर मुखत आसेचित ।” इला काथा सुनिए निदुरला खिलखिलाए हाँसिए उठिल आर कुछुछिन वाद, उखान किताव टुक्रा–टुक्रा हए गेल । निन्दुर बुद्धियार रहे । उहाँक थाहा छिल्कि कितावत् लिखाल रहले मात्र निहबे, उहाँत अमल कर्ले मात्र हबे । बास्तवत् पढ्ले हयना, गढ्ले हए ।