आदिवासि सांस्कृतिक कार्यक्रम हवार तयारित

          बेनियानि, भादर १८ : झापार पुर्व आर दख्खिन कन बेनियानि , कचनकबल गाउँपालिकात सधाकार लाखा इसाल भि जात्रा पाबनिर उपलक्षत सांस्कृतिक कार्यक्रमेर आयोजना हवार निश्चित हइचे । ७० प्रतिसत से बेसि आदिवासि समुदाय बसोबास कर्वार इखान ठाईत बिगत दस बच्छर से बेसि समयत हरेक साल जात्रा पाब्नित विभिन्न सांस्कृतिक कार्यक्रमेर आयोजना हइते आसिचे । सांस्कृतिक रुपत धनि रहाल हेतिनाकार आदिबासिलार गित–संगित, कला संस्कृति संरक्षनेर ताने इखान कार्यक्रम कर्वार काथा फर्साडाँगि निवासि कलाकार टेक बहादुर राजबंसिर जानकारि कराइचे । बिगत कुछु बच्छरसे बिकास आर धन्तव बढ्वार संग–संगे हितिना स्थानिय तथा राष्ट्रिय स्तरेर कार्यक्रमला हइते आस्वार पर भि उला कार्यक्रमत बाहिरिर नृत्य, कला आर संस्कृतिलार मात्र प्रस्तुतिला प्रर्दशन कराजावार पर आपनार आपत्ति जनाइते हितिना बसोबास कर्वार कोच लार बाहुल्यिय हवार कारनत कोच गित–संगित, कला संस्कृति लाक समेत समिटिएने आगुबिति बढ्वार जरुरि महसुस करावार ताने इसाल आप्ने कार्यक्रमेर आयोजनात लागिए पर्वार काथा आयोजक आदिवासि विध्याथि कल्यान समितिर कहना छे । 

बनियानि विद्यालयर प्राङ्गण्त आस्वार असोज महिनार १३ गते शुक्रबारेर दिन आयोजना हवार इखान कार्यक्रमत चर्चित गायक बलबाहादुर राजबंसि, कोच गायन प्रतियोगितार प्रथम दिलकुमार राजबंसि, गायक राम राजबंसि, गायिका निकिता राजबंसि, हास्य कलाकार टेक बहादुर राजबंसिर बिसेस प्रस्तुति सगे कोशि एफ.एम. एर प्रस्तोता दिपेश ताजपुरिया कायक्रमेर संचालक रुपत रहवार काथा आयोजक समितिर जानाइचे । साथे कार्यक्रमत अन्य स्थानिय कलाकारलार समेत प्रस्तुति रहवार काथा छे ।